كيف تكتب رواية

"كيف تكتب رواية"

الكاتب: كامل قضيب

قبل أن ابدأ فى شرح الموضوع بالتفصيل اسمحوا لى بالإجابه عن  بعض الأسئله التى وصلتنى على الخاص بخصوص هذا الموضوع ..
---------

س/ ايه الحاجات اللى لازم اراعيها وانا بكتب روايه والشروط الواجب توافرها عشان اكون كاتب ناجح ؟

فى الحقيقه فيه حاجات كتير لازم تكون متوافره فى الكاتب عشان ينجح ويثبت وجوده..

 أولا / الصبر..

 الصبر على القراءه والكتابه من اهم عوامل النجاح فالقراءه هامه جدا لتطوير الأفكار والبحث عن كل جديد وليس الصبر على القراءه فقط بل على المراجعه والتنقيح لما كتبته فالكتابه لا تنتهى عند اول مسوده بل تحتاج الى مراجعات عديده ..

وأيضا الصبر على رفض النشر حتى تجد الفرصه المناسبه مع الناشر الجيد الذى يجيد التسويق لكتابك والصبر ايضا على نقد القراء بعد ان يصدر كتابك بالمكتبات فروايتك ملكك وحدك مادامت فى درج مكتبك لكن بمجرد وصولها لأيدى القراء فقد أصبحت ماده للنقد والهجوم والمدح من قبل القراء ..

أيضا من صفات الكاتب الناجح تسجيل الافكار الجديده أولا بأول سواء على الهاتف او فى مفكره صغيره لحين العوده اليها عند الحاجه وايضا المداومه على الكتابه يوميا لنصف ساعه على الاقل حتى تصبح عاده يوميه حتى لو كان ما تكتبه مجرد فكره او خواطر عابره .. المهم الا تتوقف عن الكتابه ..

---------

س2/لما احول افكارى لقصه قصيره ازاى ألفت نظر القراء ليها ؟
ج2/ بالنسبه للقصه القصيره ينبغى ان يلفت عنوانها القارئ اولا وان تكون سريعه الأحداث دون اسهاب أو تطويل أو غزاره فى الشخصيات حتى لا يتفرع منك موضوع القصه وتتحول الى روايه قصيره .
---------

س3/ ازاى اعرف ان فكرتى تنفع تبقى روايه ؟

ج3 / ده سؤال مهم جدا ..

اولا انت ممكن تكتب فكرتك قصه قصيره فى الاول او حتى على هيئه مقال واقرا اللى كتبته بمنتهى الدقه وشوف : هل ما كتبته اشبع فكرتك من جميع النواحى أم انك تحتاج الى مزيد من الاضافات ؟ لو شفت ان الفكره لسه ناقصه ابتدى حولها لروايه لو حاسس ان الموضوع ناقصه كتير ويستحق اكتر من كده..

---------

س4 / ازاى اعرف ان روايتى تصلح للنشر ؟

ج4 / وده سؤال بيشغل الكل دايما ..

أولا حضرتك ممكن تعرضها على صديق لك يقراها كويس ويقولك رأيه بس المهم انه يكون قارئ قديم وبيحب القراءه وواسع الاضطلاع وياريت لو امكن تعرضها على كاتب صديق لك تعرفه بصفه شخصيه لإبداء ملاحظاته عن عملك واهتم بكل كبيره وصغيره يقولها ومتحاولش تعتقد انك كتبت مالم يكتبه السابقون وتقبل الرأى بصدر رحب ..

راجع روايتك اكتر من مره ولو امكن تعرضها على مصحح لغوى لتصحيحها لو كانت امكانياتك اللغويه محدوده واهتم بكل التفاصيل قبل ارسال الروايه الى الناشر..

---------

ودلوقت نوصل للسؤال الأهم..

س5 / إزاى أبدأ كتابه الروايه ؟

ج5 / اولا اى روايه فى العالم عباره عن 3 عناصر: مقدمه .. وعرض .. وخاتمه ..

فى البدايه عايزين نفهم يعنى ايه روايه ؟

إيه هوه مفهوم الروايه ؟

الروايه عباره عن قصه طويله تعالج مواقف انسانيه اجتماعيه او غراميه او خيال علمى وفانتازيا متسعه الزمان والمكان ومتعدده الشخصيات والاحداث ..

طيب ايه هيه أليات وضوابط الكتابه ؟

اولا لازم تحدد نوع الروايه اللى هتكتبها .. رعب .. رومانسى اجتماعى .. خيال علمى ..

حدد ابطال روايتك .. اكتب اسمائهم فى ورقه منفصله مع تحديد صفاتهم ولو امكن اشكالهم ده طبعا حسب نوع الروايه ..
لا تكثر من الشخصيات يعنى متخليش عدد الابطال فى الروايه 20 شخصيه مثلا إلا لو كان الموضوع كبير ويستحق وشايف انك ممكن تكتب روايه من 500 صفحه مثلا ..

حاول تخلى روايتك واقعيه على اد ما تقدر .. القارئ بيحب يكون فيه شئ من الواقعيه فى الاحداث حتى لو كان بيقرا خيال علمى ..
قريت زمان روايه رومانسيه عن شاب مستهتر كان راكب عربيته وفى اول الروايه ضرب فتاه بسيارته ضربه بسيطه وعندما ثارت فى الشارع ثار هو الآخر وصفعها امام الماره وعندما انصرفت أنبه ضميره فذهب الى منزلها ليعتذر لها وعزمها على الغداء فى مطعم بالخارج فوافقت على الفور ..

هل هذا منطقى ؟

اولا هوه عرف عنوانها منين ؟ ثانيا هيه بسهوله كده توافق على نزولها معاه بعد ضربه ليها فى الشارع امام الناس خصوصا انه شاب غريب لا تعرفه من قبل ؟

ده مجرد مثال .. القارئ بيحب التسلسل المنطقى فى الأحداث حتى لو كان خيال وبيكره اللى بيستخف بعقله حتى لو كان بيقرى لكاتب كبير ..
بافتراض انك بتكتب روايه فى الستينات مثلا يبقى لازم متتكلمش عن الموبايلات او اللاب توب وآخرك الهاتف الارضى ..
لو كانت روايه خيال علمى مينفعش الشخصيات تستخدم رصاصات تقليديه مثلا الا بسبب مقنع وحبكه منطقيه ..

حبكه الروايه اهم حاجه بالنسبه للقارئ ..

بعد كده ضع عنوانا للروايه واكتب ملخص عنها يساعدك فى ترتيب افكارك من البدايه للنهايه ..

---------

حدد هتعمل روايتك كام صفحه او كام فصل منعا للتطويل ( ودى حاجه ترجع برضه للأحداث لان ممكن الاحداث تتفرع منك )
حدد عدد صفحات تكتبه يوميا والتزم بيه .. متخليش حاجه تمنعك عن الكتابه ..

ملحوظه هامه .. لازم تكون مستمتع وانت بتكتب .. كتابه الروايات حياه تانيه .. شخصيات جديده واماكن مختلفه صنعتها بخيالك .. انفصل عن واقعك ومشاكلك بقدر الامكان اثناء الكتابه .. انسى همومك اللى فى البيت واندمج مع شخصيات الروايه انفصل عن النت والفيس طول ما انت بتكتب .. حاول تندمج بقدر الامكان ..
ابحث على النت عن اى معلومه ممكن تفيدك فى الموضوع بتاع روايتك .. لو بتكتب عن الجن ابحث عن معلومات عنهم .. لو بتكتب عن الحب اقرا روايات رومانسيه كتير وكمان اتفرج على افلام رومانسيه ..
ابدأ الكتابه مستعينا بالملخص وحاول ألا تتوقف ..
خد وقتك فى الكتابه متستعجلش فى انهاء الروايه المهم تنجزها على اكمل وجه ..

حدد فى الشخصيات مين بيحارب مين ومين بيحب مين ..
اكتب ملخص للروايه فى جمله واحده مثلا ( فريق من الاصدقاء يقومون فى المستقبل باقتحام كهف غامض تحل عليهم لعنته مدى الحياه  ..(
مش شرط تكون محدد نهايه الروايه سيبها حسب تسلسل الاحداث ..
مش شرط تكتب روايه من 500 صفحه عشان تكون جيده ممكن تكون اقل من 200 صفحه وتكون روعه ..

اكتب فى البدايه بأسلوب بسيط يصل للقارئ بسهوله متحاولش تكتب بحذلقه مدعيا ان ده اسلوب الكاتب الكبير فلان الفلانى عشان القارئ بيحب البساطه ..

ضع حوار الشخصيات فى اسطر منفصله بعيدا عن السرد حتى لا يتشتت منك القارئ ..

مش شرط روايتك يكون فيها معلومات علميه عشان تنجح .. ممكن ميكونش فيها ولا معلومه وتنجح باذن الله دى روايه مش بحث علمى .. عندك روايه ارض زيكولا مفيهاش اى معلومه مفيده ونجحت نجاح مخيف .. ده توفيق من ربنا ..

---------

اكتب فى موضوع بتحبه وسيبها على ربنا ..

لازم تكون بتحب اللى بتكتبه عشان يوصل لقلوب الناس .. اخلص لعملك والله يبث ما يشاء فى القلوب ..

مهما حاولت ترضى كل القراء مش هتعرف لازم هتتهاجم .. خد دى قاعده ..

بعد ما تخلص كتابه اقرأ روايتك وراجعها مش بعين الكاتب .. اقراها بعين الناقد وشوف هل انت مستمتع كقارئ بما كتبته ؟
حاول انك تبدأ بالفصحى فى الكتابه عشان تثبت للقارئ حصيلتك اللغويه وامكانياتك ككاتب .. لو كتبت بالعاميه يبقى ايه الفرق بين ابداعك الأدبى والكلام اللى بيتقال فى الشارع ؟
حاول تخلى لكل شخصيه هدف فى الروايه ومغزى مش مجرد تعدد شخصيات وخلاص ..

اتقى الله فى اللى بتكتبه واعرف ان اللى كتبته ده هيدخل بيوت الناس وهيقراه الشاب المراهق والبنت الصغيره والآنسه والأم فاكتب شيئا لا تخجل منه ويشرفك امام الناس وتذكر انك ستحاسب يوما على ما كتبت امام الخالق عز وجل ..

وأخيرا .. حاول ان تجعل نهايه روايتك منطقيه بقدر الامكان فالقارئ يبغض النهايات المحبطه والتى لا تسير وفقا لتسلسل الاحداث ..
اتعشم أن تكون هذه القواعد البسيطه قد أفادتكم لبدء أولى ابداعاتكم فى عالم كتابه الروايه ..

تحياتى لكم ..

وبالتوفيق للجميع بإذن الله ..

---------

#كامل_قضيب

#كيف_تكتب_رواية